Sidhaya 12: Pagbasa at Pagsusuri Tungo sa Pananaliksik (Batayang Aklat sa Filipino sa Senior High School)

Sa pagbabagong nagaganap sa kasalukuyang panahon hatid ng mass media at makabagong teknolohiya lalong-lalo na ang malaganap na paggamit ng cellphone, iPad, at tablet ng kabataan at ng maraming tao hindi lang sa Pilipinas kundi sa buong mundo, inihahanda ng batayang aklat na ito ang mga mag-aaral sa realidad ng pagbabagong ito at sa kahalagahan ng mabisa, matalino, at kapaki-pakinabang na komunikasyon sa ika-21 siglo. Bukod pa rito, nakadisenyo ang batayang aklat na ito para matutuhan at maranasan ng mga magaaral ang paglahok sa mga kolaboratibong gawain at makapaghain ng mga makabagong ideya at solusyon sa mga problemang haharapin nila ngayon at sa hinaharap hinggil sa kanilang personal at propesyonal na buhay, at pakikisalamuha sa lipunan. Bukod sa paghubog sa kanilang kritikal na pag-iisip, mahalaga ring mapagyaman at mapalawak ang malikhain at integratibong pag-iisip ng mga mag-aaral. Sa ganitong dulog, sentral sa karanasan ng pagkatuto ang mga mag-aaral, kasama na rin ang mga guro na natututo bilang kalahok at tagapagpadaloy ng aralin at mga gawain sa loob o labas ng silid-aralan.