Sidhaya 11: Komunikasyon at Pananaliksik sa Wika at Kulturang Pilipino (Batayang Aklat sa Filipino sa Senior High School)

Ang Sidhaya 11: Komunikasyon at Pananaliksik sa Wika at Kulturang Pilipino ay batayang aklat sa Filipino sa Senior High School Grade 11. Ito ay binago’t pinagyamang edisyon ng Makabagong Filipino Sa Nagbabagong Panahon (Filipino 1) at Makabuluhang Filipino sa Iba’t Ibang Pagkakataon (Filipino 2) na parehong limbag ng C & E Publishing, Inc. bilang tugon sa bagong kurikulum na K to 12 ng Kagawaran ng Edukasyon (Department of Education o DepEd). Inakma ang batayang aklat na ito sa mga pagbabagong nagaganap sa kasalukuyang panahon hatid ng mass media at makabagong teknolohiya lalong-lalo na ang malaganap na paggamit ng cellphone, iPad, tablet ng kabataan at ng maraming tao hindi lang sa Pilipinas ngunit sa buong mundo. Inihahanda ng batayang aklat na ito ang mga mag-aaral sa realidad ng pagbabagong ito at sa kahalagahan ng mabisa, matalino, at kapaki-pakinabang na komunikasyon sa ika-21 siglo. Bukod pa rito, nakadisenyo ang batayang aklat na ito para matutuhan at maranasan ng mga mag-aaral ang paglahok sa mga kolaboratibong gawain at makapaghain ng mga makabagong ideya at solusyon sa mga problemang haharapin nila ngayon at sa hinaharap hinggil sa kanilang personal at propesyonal na buhay, at pakikisalamuha sa lipunan. Bukod sa paghubog sa kanilang kritikal na pag-iisip, mahalaga ring mapagyaman at mapalawak ang malikhain at integratibong pag-iisip ng mga mag-aaral.