El Filibusterismo ni Jose P. Rizal

Walang kamatayan ang nobelang El Filibusterismo ni Dr. Jose P. Rizal. Bagaman ito’y isinulat noong panahon ng Kastila, mababakas pa rin sa kasalukuyan ang ilang mga sakit ng lipunan na tinalakay ng ating bayani sa kanyang nobela. Ang pagtalakay sa nobelang ito’y kasama sa kurikulum na dapat ituro sa mga estudyanteng nasa mataas na paaralan. Bilang karagdagan, may Batas Rizal na nag-aatas na kailangang pag-aralan ang mga literaturang isinulat ng ating bayani maging ito’y tula, sanaysay, maikling kuwento o nobela. Sa ganitong adhikain, nagkaroon ng inspirasyon ang may-akda na magdisenyo ng aklat na makatutulong sa kabataan na maunawaan ang El Filibusterismo. Nilapatan ng iba’t ibang gawaing pangklase ang bawatkabanata ng nobela nang sa ganoon ay maging kawili-wili at mapahalagahan ng estudyante ang akdang ito ng ating bayani.